Вядомы расейскі рэпер Баста трапіў у жорсткае ДТЗ

• 3.12.2023, 13:16

Ягоную машыну занесла ў гурбу пасля сутыкнення.

Расейскі рэпер родам з Украіны Баста на днях патрапіў у жорсткае дарожна-транспартнае здарэнне ў Санкт-Пецярбургу. Ён на сваім аўто Maybach сутыкнуўся з кіроўцам Kia, паведамляе УНІАН.

У выніку сутыкнення аўтамабіль Басты занесла ў гурбу, аднак ні ён, ні іншы кіроўца не пацярпелі.

Варта адзначыць, што Васіль Вакуленка (сапраўднае прозвішча рэпера – рэд.) сядзеў на заднім сядзенні Maybach падчас аварыі на Паўднёвай Дарозе. Гэта і выратавала яму жыццё.

Таксама расейскія СМІ паведамляюць, што пасля ДТЗ ён пайшоў у бок рэстарана, а потым з'ехаў на іншым аўтамабілі.

Усё здарылася адразу ж пасля канцэрта – прыкладна ў 22:30. Тады артыст пакідаў «Газпрам Арэну» пасля свайго піцерскага выступу на 64 тысячы чалавек.

Што вядома пра Баста

Баста нарадзіўся і вырас ва Украіне. Тут ён даваў шматлікія канцэрты і збіраў аншлагі. Але гэтага яму было мала. Артыст падаўся ў Расею. У краіне-агрэсарцы ён не толькі выступаў, але і быў суддзёй талент-шоу.

Пра поўнамаштабнае расейскае ўварванне ён маўчыць. Аднак пасля 2014 года ён некалькі разоў ездзіў у незаконна анэксаваны Крым.

У 2021 годзе ён прыязджаў ва Украіну, дзе ў адным з рэстаранаў адбыўся інцыдэнт паміж наведвальнікам і ягонай аховай. У 2022 годзе ў Басты мусіў быць канцэрт ва Украіне, аднак актывісты яго сарвалі.