Дзяржаўны памежны камітэт заявіў пра «фіксацыю» рызыкаў пераносу дыверсійных дзеянняў у Беларусь

• 12.08.2024, 20:40

У ДПК расказалі пра «вядзенне выведкі беларускай тэрыторыі».

У Дзяржаўным памежным камітэце паведамілі пра фіксаванне рызыкаў пераносу дыверсійных дзеянняў у Беларусь, паведамляе БелТА.

Сярод іншага, афіцыйны прадстаўнік ДПК Антон Бычкоўскі паведаміў, што беларускі бок фіксаваў рызыкі пераносу дыверсійных дзеянняў на тэрыторыю краіны.

– Мы фіксавалі нарастанне рызыкі пераносу дыверсійна-тэрарыстычных дзеянняў на тэрыторыю нашай краіны, – заявіў ён.

А потым удакладніў, што гэта было і актыўнае вядзенне выведкі беларускай тэрыторыі, і спробы пранікнення для абсталявання ў памежжы Беларусі сховішчаў са сродкамі паразы. І таксама ўказаў, што Беларусь была вымушаная на гэта рэагаваць, і таму была ўзмоцненая ахова мяжы.

– У тым ліку задзейнічаныя не толькі памежнікі, але і вайсковыя падраздзяленні, – удакладніў ён.

У той самы час Бычкоўскі паведаміў, што на гэты момант адзначаецца значнае зніжэнне колькасці правакацый з боку ўкраінскіх вайскоўцаў. І не назіраецца цяпер новых правакацый паблізу дзяржмяжы або перадумоваў да іх.

Пры гэтым афіцыйны прадстаўнік ДПК звярнуў увагу на тое, што цяпер абстаноўка на мяжы з Украінай знаходзіцца цалкам пад кантролем.

– Абстаноўка на ўкраінскім кірунку сёння поўнасцю кантралюецца. Памежнікі прадаўжаюць несці службу на паўднёвых рубяжах ва ўзмоцненым рэжыме, – сказаў на заканчэнне ён.