Вікторыя Азаранка знялася з турніру ў Цынцынаці

• 14.08.2024, 19:41

У асноўнай сетцы выступіць зараз толькі адна беларуска - Арына Сабаленка.

Вікторыя Азаранка знялася з турніру ў Цынцынаці (ЗША). Пра гэта стала вядома ў сераду напярэдадні яе паядынку з італійкай Лючыяй Бранцэці.

Гэтую інфармацыю прыводзіць прэс-служба WTA. Чаму менавіта Азаранка надумала ўстрымацца ад выступу ў Цынцынаці, не паведамляецца.

У асноўнай сетцы жаночага адзіночнага разраду выступіць зараз толькі адна беларуска - Арына Сабаленка.

Першапачаткова спаборніцай беларускай тэнісісткі ў першым раундзе павінна была стаць амерыканка Аманда Анісімава, але яна знялася з турніру.

Праблемы ў Азаранкі ўзніклі на нядаўнім турніры ў Таронта, калі яна не дагуляла паядынак 1/8 фіналу з амерыканкай Пэйтан Стэрнс — адмовілася ад барацьбы пры ліку 4:6, 2:4.

Прызавы фонд спаборніцтваў перавышае $6,2 мільёна.