«Штомесяц Пуцін будзе страчваць мільярды даляраў»
- 12.01.2025, 13:45
Байдэн увёў беспрэцэдэнтныя ў моцы санкцыі.
10 студзеня Байдэн абвясціў беспрэцэдэнтныя санкцыі супраць нафтагазавай прамысловасці Расеі. Чакаецца, што яны нанясуць эканоміцы краіны-агрэсаркі вялікія страты і паўплываюць на яе здольнасць прадаўжаць вайну ва Украіне.
Калі ўведзеныя Байдэнам санкцыі прадоўжаць дзеянне і пры адміністрацыі Трампа, яны маюць шанец нанесці самы магутны ўдар па прыбытках Расеі, які калі-небудзь быў зроблены, паведамляе Reuters.
Кішэня Пуціна павінна значна спусцець
Галоўны дарадца Белага дому ў пытаннях эканомікі і нацыянальнай бяспекі Дэйліп Сінгх заявіў, што гэтыя захады з'яўляюцца «самымі значнымі санкцыямі супраць расейскага энэргетычнага сектару, безумоўна, найбуйнейшай крыніцы прыбыткаў для вайны Пуціна».
Чакаецца, што гэтыя санкцыі абыдуцца Расеі на мільярды даляраў за месяц. «Няма ніводнага этапу ў вытворча-размеркавальным ланцужку, які не быў бы парушаны, і гэта дае нам больш упэўненасці ў тым, што абыход санкцый абыдзецца Расеі яшчэ даражэй», – сказаў амерыканскі чыноўнік у каментары журналістам.
Крыніцы ў расейскім гандлі нафтай і індыйскай нафтаперапрацоўчай прамысловасці ў сваю чаргу адзначылі, што санкцыі прывядуць да сур'ёзных перабояў у экспарце расейскай нафты ў яе асноўных пакупнікоў – Індыю і Кітай.
Джэфры Паят, намеснік дзяржсакратара ЗША ў энэргетычных рэсурсах, паведаміў, што сёлета чакаецца паступленне новых аб'ёмаў нафты з ЗША, Гаяны, Канады і Бразіліі, а таксама, магчыма, з Блізкага Усходу, што заменіць страту паставак з Расеі.
«Мы чакаем, што наша прамое нацэльванне на энэргетычны сектар узмоцніць гэты ціск на расейскую эканоміку, які ўжо падштурхнуў інфляцыю амаль да 10 адсоткаў, і ўзмоцніць змрочныя эканамічныя перспектывы на 2025 год і далей», – сказаў адзін з чыноўнікаў.
У адміністрацыі Байдэна заявілі, што нават калі Трамп захоча скасаваць гэтыя санкцыі, ён не зможа зрабіць гэта без Кангрэса. Між тым многія рэспубліканцы заклікалі Байдэна прыняць гэтыя новыя абмежаванні.
Раней у Белым доме адмаўлялі сувязь паміж санкцыямі і будучымі перамовамі пра вайну ва Украіне.