У Аўстраліі памылкова знеслі дом, дзе быў заснаваны легендарны рок-гурт AC/DC

• 13.01.2025, 16:57

Доўгі час гэты дом быў месцам, якое наведвалі прыхільнікі рок-гурта з усяго свету.

У прыгарадзе аўстралійскага Сіднэя памылкова знеслі дом, у якім быў заснаваны легендарны рок-гурт AC/DC. Пра гэта паведамляе CNN.

Пад знос трапіў аднапавярховы цагляны дом у Бервудзе, у якім правялі сваю маладосць і заснавалі гурт браты Ангус і Малкольм Янгі. У Аўстралію сям'я музыкаў пераехала з Шатландыі. Доўгі час гэты дом быў месцам, якое наведвалі прыхільнікі рок-гурта з усяго свету.

У сакавіку мінулага года былы дом знакамітасцяў набыў забудоўнік Burwood Square. За яго заплацілі $3,6 млн, а ў снежні 2024-га дом надумалі знесці. Цяпер жа забудоўнік сцвярджае, што не ведаў аб культурнай значнасці пабудовы.

Гендырэктар кампаніі заявіў, што «папярэдні шматгадовы ўладальнік не падзяліўся гэтай важнай часткай гісторыі аб'екта». Ён удакладніў, што быў шакаваны, даведаўшыся пра сувязь дома з рок-гуртом ужо пасля зносу дома.

На месцы былога дома заснавальнікаў AC/DC пабудуюць 50-павярховы будынак са 120 гатэльнымі нумарамі і 48 кватэрамі.

Паведамляецца, што дом быў у занядбаным стане. Сям'я Янгаў жыла тут з 1965 да 1978 года. У 1985-м у будынку адкрылі бардэль, а пазней тут працаваў медкабінет. І хаця дом быў унесены ў Аўстралійскі нацыянальны траставы рэестр у 2013 годзе, ён не атрымаў гістарычную абарону, каб прадухіліць знос. Як сказана ў дакументах, «перыяд пражывання гурта ў гэтым доме быў занадта кароткім, каб мець дачыненне да жыцця і працы AC/DC».