Брытанскі баксёр Тайсан Ф'юры зноў скончыў кар'еру

• 13.01.2025, 19:10

Ён раней неаднаразова абвяшчаў аб сыходзе з бокса, але неўзабаве вяртаўся.

Былы чэмпіён WBC у суперцяжкай вазе брытанец Тайсан Ф'юры, які саступіў у двух апошніх баях украінцу Аляксандру Вусіку, заявіў аб заканчэнні кар'еры ў 36 гадоў. Аб гэтым ён паведаміў у Instagram.

У ноч на 22 снежня ў Эр-Рыядзе Ф'юры саступіў Вусіку аднагалоснай пастановай суддзяў у баі-рэваншы за паясы WBC, WBA і WBO.

Усяго на рахунку Ф'юры 37 баёў, у якіх ён атрымаў 34 перамогі, адзін скончыў унічыю і яшчэ ў двух саступіў.

Ф'юры раней ужо абвяшчаў аб заканчэнні кар'еры, дарэчы, у 2016-м (амаль праз год пасля перамогі над Уладзімірам Клічко і здачы станоўчай пробы на какаін) і ў 2022-м, калі перамог суайчынніка Дыльяна Уайта.

Ф'юры ўпершыню стаў чэмпіёнам свету паводле версій WBA, WBO і IBF, перамогшы Клічко ў 2015-м. Аднак рэванш так і не адбыўся. і брытанец у 2016-м вызваліў паясы WBA і WBO, а тытул IBF страціў яшчэ раней праз адмову ад бою з абавязковым прэтэндэнтам украінцам Вячаславам Глазковым.

Чэмпіёнам WBC Ф'юры стаў у 2020-м, перамогшы Дэантэя Уайлдэра, і валодаў поясам да першага аб'яднальнага бою з Вусікам у траўні 2024-га.