Дуда і Трамп сталі палітыкамі года ў Польшчы

• 13.01.2025, 21:40

Апытанне.

Дзейны прэзідэнт Польшчы Анджэй Дуда і абраны прэзідэнт ЗША Дональд Трамп сталі тымі, каго палякі найчасцей назвалі палітыкамі 2024 года.

Так паказала апытанне Цэнтра даследавання грамадскай думкі Польшчы (CBOS), паведамляе RMF FM.

На пытанне, хто з'яўляецца палітыкам 2024 года ў Польшчы, амаль палова рэспандэнтаў (48%) не назвалі ніводнага чалавека.

Больш за ўсё з іх – тых, хто не захацеў або не змог адказаць на гэтае пытанне (30%). Блізу 16 адсоткаў рэспандэнтаў заявілі, што не ўважаюць за палітыка года нікога, 2 адсоткі адмовіліся адказваць на пытанне.

Астатнія рэспандэнты назвалі больш за 30 імёнаў палітыкаў і грамадскіх дзеячаў. Першае і другое месцы з прыкметным адрывам ад астатніх занялі Анджэй Дуда (13%) і Дональд Трамп (12%). Яны сталі палітыкамі года ў Польшчы і ў свеце адпаведна.

Трэцяе месца заняў спікер Сейма Шымон Галаўня (4%), за ім ідуць кандыдаты ў прэзідэнты ад ультраправай «Канфедэрацыі» Славамір Менцэн і мэр Варшавы Рафал Тшаскоўскі (3% у кожнага).

Яшчэ 2% галасоў кожны атрымалі палітык «Канфедэрацыі», скандальны еўрадэпутат Гжэгаж Браўн, прэзідэнт «Права і справядлівасці» Яраслаў Качыньскі і міністр замежных справаў Радаслаў Сікорскі.

Сярод замежных дзеячаў больш за 2%, акрамя Трампа, атрымалі таксама дзейны прэзідэнт ЗША Джо Байдэн (9% галасоў) і прэзідэнт Украіны Уладзімір Зяленскі (5%).

Апытанне ў Польшчы праводзілася з 28 лістапада да 8 снежня 2024 года і ахапіла 915 чалавек.

Адзначым, што палітыкам 2022 года за мяжой палякі выбралі Уладзіміра Зяленскага.