Беларуска спрабавала купіць смартфон у Instagram-канфіскаце «з мноствам падпісчыкаў»

• 14.01.2025, 9:40

Атрымалася не вельмі.

Мянчанка пазбавілася дзвюх тысяч рублёў, спрабуючы набыць смартфон праз Instagram. Падрабязнасці інцыдэнту расказалі ў прэс-службе МУС.

Гаджэт жанчына хацела купіць у падарунак сваяку. У Instagram яна знайшла старонку онлайн-крамы, якая выклікала давер «вялікай колькасцю падпісчыкаў і добрых водгукаў пакупнікоў».

«Мянчанка перайшла праз спасылку і звязалася з мэнэджэрам, які патлумачыў, што онлайн-крама прадае канфіскаваныя тавары, таму кошты значна ніжэйшыя за рынкавыя, у сувязі з чым для замовы неабходна ўнесці папярэднюю аплату сумай 2000 рублёў», — паведамілі ў МУС.

Дзяўчына пагадзілася і перавяла грошы, аднак пасылку так і не атрымала.

Распачатая крымінальная справа за махлярства.