Пад Нясвіжам прадаюць старажытную рэзідэнцыю Радзівілаў

• 14.01.2025, 17:47

Шанец адчуць сябе магнатам за невялікія грошы.

На пляцоўцы па продажы маёмасці «БелЮрЗабеспячэнне» з'явілася інфармацыя аб продажы старажытнай рэзідэнцыі князёў Радзівілаў. Дакладней таго, што ад яе засталося, піша Blizko.by.

У аб'яве сказана няхітра: «Будынак адміністрацыйны «Альба». Прызначэнне: будынак спецыялізаваны іншага прызначэння. Складовыя часткі і прылады: цэлы двухпавярховы цагляны будынак асноўнага корпуса біяміцыну П2/к з халоднай прыбудовай». Продажам займаецца кампанія «Комплекс Лэйк».

Але гэта не проста цагляны будынак, а ацалелая частка фамільнай рэзідэнцыі князёў Радзівілаў у маёнтку Альба пад Нясвіжам. Яе заклаў яшчэ ў канцы 16 стагоддзя Мікалай Хрыстафор Радзівіл «Сіротка», які пасля падарожжа па Заходняй Еўропе надумаў у сябе ў Нясвіжы збудаваць нешта падобнае на сядзібу еўрапейскага феадала. Засяленне Альбы як загараднай рэзідэнцыі Радзівілы пачалі ў канцы XVI стагоддзя, тады ж быў закладзены шырокі парк.

Самы стары палац ансамбля, Эрэміторый, быў пабудаваны Мікалаем Хрыстафорам Радзівілам і быў цалкам страчаны да XIX стагоддзя. Палацы, якія ўзводзіліся ў наступны час, таксама былі разбураныя падчас шматлікіх войнаў.

Да нашых дзён захаваўся толькі бровар, пабудаваны ў пачатку 20 стагоддзя. У ім дагэтуль размяшчалася вытворчасць. Будынак зазнаў шматлікія перабудовы і прыбудовы і зараз знаходзіцца ў вельмі непрывабным стане.

Цікава, што ў ахоўным абавязанні да лота напісана, што фальварак пабудаваны ў 22 стагоддзі.

Стартавая цана лота - 12 тысяч рублёў. Акрамя таго, пакупнік павінен будзе аплаціць выдаткі на абслугоўванне аўкцыённай пляцоўкі (3% ад сумы лота) і 119 рублёў выдаткаў. Разам мінімальны выніковы кошт складзе 12 479 рублёў, ці прыкладна 3 567 даляраў.