Адхілены прэзідэнт Паўднёвай Карэі арыштаваны

• 15.01.2025, 8:16

Дагэтуль палітык тыднямі хаваўся ў рэзідэнцыі.

Сёння следчыя прыйшлі да рэзідэнцыі адхіленага прэзідэнта Паўднёвай Карэі Юн Сок Еля, каб другім разам паспрабаваць яго арыштаваць. Гэты раз праваахоўнікам удалося затрымаць кіраўніка дзяржавы.

Аб гэтым паведамляе Yonhap News.

Як піша выданне, следчыя затрымалі Юна, якому быў абвешчаны імпічмент, у яго рэзідэнцыі ў сераду. Пасля яго павезлі на допыт у сувязі з кароткачасовым ваенным становішчам у краіне, якое ён увёў у снежні.

Са звестак упраўлення расследавання карупцыі сярод высокапастаўленых службовых асоб, ордэр на затрыманне адхіленага прэзідэнта быў выкананы раніцай а 10:33. Для арышту ў тым ліку выкарыстоўваліся драбінкі, каб залезці ў вокны рэзідэнцыі.

«Жывая трансляцыя паказала, як калона аўтамабіляў, як мяркуецца, вязе Юна, выязджае з прэзідэнцкай рэзідэнцыі ў цэнтры Сеула і накіроўваецца ў офіс CIO ў Квачхоне, на поўдзень ад Сеула», - піша выданне.

Да гэтага палітык тыднямі хаваўся ў рэзідэнцыі, не выходзіў на двор і не з'яўляўся на допыты. Акрамя таго, служба бяспекі прэзідэнта і вайскоўцы блакавалі ўваходы ў рэзідэнцыю, як на гэты раз, так і ў папярэднія разы, каб не дапусціць арышту.

СМІ адзначаюць, што ў гісторыі Паўднёвай Карэі ўпершыню арыштавалі часова адхіленага, але дзейнага прэзідэнта краіны.

Нагадаем, 3 снежня прэзідэнт Паўднёвай Карэі Юн Сок Ель увёў ваеннае становішча ў краіне. Яно доўжылася блізу 6 гадзін і ўвогуле было звязана не з ваеннай пагрозай, а выключна з-за палітычных матываў, як пісалі ў СМІ. Неўзабаве Юн папрасіў прабачэння за тое, што прыняў такую пастанову.

Аднак 14 снежня, парламент Паўднёвай Карэі абвясціў яму імпічмент.