Беларуская фура з хімічным рэчывам перакулілася ў Казахстане

• 15.01.2025, 10:23

На месца ДТЗ прыбыла радыяцыйна-хімічная служба.

У Казахстане ў ДТЗ патрапіў грузавы аўтамабіль з Беларусі, які перавозіў 21 тону небяспечнага хімічнага рэчыва. Пра гэта паведамляе ў сваім ТГ-канале прэс-служба МНС Казахстана.

Здарэнне адбылося ў раёне горада Байтэрэк Заходне-Казахстанскай вобласці. У кювет з'ехала фура з тэтрагідрафуранам. Ёмістасці з вадкасцю перакуліліся, але выцеку небяспечнага грузу ўдалося пазбегнуць.

На месца здарэння прыбылі супрацоўнікі МНС. Радыяцыйна-хімічная служба праверыла канцэнтрацыю хімічнага рэчыва ў паветры - пагрозы не выявілі.

Кіроўцу дапамаглі бяспечна вярнуцца на дарогу і адправіцца з грузам далей.