Беларусь падвысіла тарыфы на перапампоўванне нафты да мяжы Украіны

• 17.01.2025, 15:27

Новыя цэны будуць выкарыстоўваць з 1 лютага.

Міністэрства антыманапольнага рэгулявання і гандлю ўстанавіла новыя тарыфы на прапампоўванне нафты па трубаправодзе "Дружба" да мяжы Украіны. Пастанова ведамства апублікаваная на Нацыянальным прававым партале.

Кошт перапампоўвання ў кірунку Унеча (Высокае) — мяжа Беларусі і Украіны вырас з 215,78 да 239,52 расейскага рубля за тону без падатку на дададзеную вартасць.

Тарыф супадае з коштам перапампоўвання па паўднёвай галінцы Унеча - Броды. Па ёй расейская нафта паступае праз Беларусь і Украіну ў Вугоршчыну, Славакію і Чэхію.

Цана за перапампоўванне па паўночным кірунку Унеча — Адамава вырас з 629,26 да 698,48 расейскага рубля за тону. Па гэтым маршруце нафту праз Беларусь традыцыйна пампавалі ў Нямеччыну.

Новыя цэны будуць выкарыстоўваць з 1 лютага. Апошні раз тарыфы на перапампоўванне на гэтым адцінку мянялі ў жніўні 2024-га.

Дакумент устанаўлівае таксама мясцовыя тарыфы ў беларускіх рублях. Напрыклад, кошт перапампоўвання тоны нафты на адцінку Полацк - Наваполацк захавалі на ўзроўні трох капеек, а на адцінку Рэчыца - Адамава Застава падвысілі з 14,68 да 16,29 рубля. Мінулы раз гэтыя тарыфы ўстанаўлівалі ў студзені 2024-га.

З 1 студзеня выраслі таксама тарыфы на паслугі транспартавання нафтапрадуктаў па трубаправодзе ААТ "Гомельтранснафта "Дружба"" на тэрыторыі Беларусі. Размова ідзе аб кірунках Полацк — Крулеўшчызна і Полацк — Фаніпаль.