Урад Ізраіля зацвердзіў угоду з ХАМАС пра вяртанне закладнікаў

• 18.01.2025, 10:27

24 міністры былі «за», пяць – «супраць».

Пасля доўгага пасяджэння ўраду Ізраіля ў ноч на суботу, 18 студзеня, угода з ХАМАС пра вызваленне закладнікаў была зацверджаная.

Пра гэта расказаў раніцай у суботу сайт 12-га тэлеканала. Паседжанне скончылася далёка за поўнач. За ўгоду былі ўсе міністры ад «Лікуды», акрамя Аміхая Шыклі і Давіда Амсалема, міністры ад ультраартадаксальных партый і ад партыі «Правыя дзяржаўнікі». Супраць былі міністры ад партыяў «Рэлігійны сіянізм» і «Габрэйская моц».

Падчас пасяджэння прэм'ер-міністр Біньямін Нетаніягу расказаў пра дыпламатычныя намаганні, што папярэднічалі з'яўленню пагаднення. «Ніякай угоды, якая, быццам бы, “даўно на стале перамоваў”, не было, – заявіў Нетаніягу. – ХАМАС быў супраць любой угоды. Сітуацыя змянілася праз гераізм салдатаў Цахала і тыя маштабныя дзеянні, якія мы распачалі ў рэгіёне, уключаючы ўдар па іранскай восі. Толькі застаўшыся ў адзіноце, ХАМАС здаўся і пагадзіўся на ўгоду».

Нетаніягу нагадаў міністрам пра міжнародную падтрымку пагаднення. «Прэзідэнт Трамп прыняў пастанову, што пасля ягонага заступлення на пасаду мы атрымаем усю прызначаную для нас зброю, адпраўка якой у Ізраіль была замарожаная ранейшай адміністрацыяй. Гэта важна, таму што, калі другой фазы пагаднення мы не дасягнем, нам спатрэбяцца дадатковыя магчымасці, каб вярнуцца да баявых дзеянняў. Прэзідэнт Трамп дае Ізраілю поўную падтрымку для вяртання да «вайны ў выпадку парушэння пагаднення».

Кіраўнік «Масада» і ўдзельнік перамоўнай групы Давід Барнэа таксама выказаў цвёрдую падтрымку пагадненню: «Мы павінны выплаціць гэты маральны абавязак. Гэтая ўгода этычна, маральна і чалавечы правільная. Яна мае механізмы, якія гарантуюць нашу бяспеку. Яна мае вагары ціску, каб прадаўжаць, калі ХАМАС не выканае сваю частку абавязальніцтваў. Наша місія – вярнуць усіх дадому». І мы не спынімся, пакуль не дасягнем сваёй мэты.

Кіраўнік Генштаба Герцы Халеві растлумачыў міністрам вайсковыя аспекты ўгоды: «Згодна з цяперашнім планам, маштаб нашых сілаў на Філадэльфійскім кірунку не толькі не паменшыцца, але і павялічыцца. Пагадненне заснаванае на мапе размяшчэння сілаў па восі, зацверджанай у жніўні летась. У перыяд дзеяння пагаднення ў нас будзе больш сілаў на восі, чым у цяперашняй сітуацыі да рэалізацыі плану».

Яшчэ адзін удзельнік перамоўнай групы генерал-маёр запасу Ніцан Алон расказаў міністрам, што настойлівасць кіраўніка ўраду прывяла да павелічэння колькасці жывых закладнікаў, якія будуць вызваленыя на першым этапе.

Нагадаем, пасяджэнне ўраду Ізраіля, прысвечанае зацвярджэнню ўгоды, пачалося з трохгадзінным спазненнем. Першапачаткова яно было прызначанае на вечар суботы, але кіраўнік ШАБАКа Ронен Бар патлумачыў міністрам, што гаворка ідзе пра выратаванне чалавечых жыццяў («пікуах нефеш»), і яны пайшлі на парушэнне шабату. Чатыры міністры, нягледзячы ні на што, не захацелі парушаць шабат. Гэта Іцхак Гольдкнапф, Міхаэль Малкіэлі, Урыэль Басо і Мошэ Арбель. Каб не зрываць паседжанне, яны пакінулі запіскі са сваімі галасамі. Усе гэтыя галасы былі за ўгоду.

Супраць быў міністр нацыянальнай бяспекі (ці то былы, ці то яшчэ не канчаткова пакінуў сваю пасаду) Ітамар Бэн-Гвір. Ён заклікаў усіх сваіх сяброў з «Лікуды» і з партыі «Рэлігійны сіянізм» спыніць працэс ухвалення ўгоды.

Напярэдадні паседжання (у 15:15) стала вядома, што вузкі кабінет бяспекі рэкамендаваў ураду ўхваліць угоду. Прэзідэнт Іцхак Герцаг прывітаў пастанову вузкага кабінета міністраў, заявіўшы, што чакае і ад ураду яе ўхвалення. «У мяне няма ніякіх ілюзій – гэтая ўгода прынясе з сабой балючыя і пакутлівыя праблемы, якія нам давядзецца пераадолець разам», – прызнаў прэзідэнт.

Як адзначае «Кан», цяперашняя ўгода ўключае некалькі зменаў у параўнанні з праектам, прапанаваным прэзідэнтам ЗША Джо Байдэнам у траўні:

110 тэрарыстаў, асуджаных да пажыццёвага зняволення, будуць вызваленыя ў абмен на дзевяць хворых і параненых закладнікаў.

Тысяча затрыманых, арыштаваных пасля 7 кастрычніка, якія не ўдзельнічалі ў баявых дзеяннях, будуць вызваленыя ў абмен на дзевяць хворых і параненых закладнікаў.

Трое тэрарыстаў, асуджаных да пажыццёвага зняволення, будуць вызваленыя ў абмен на кожнага пажылога закладніка. Гэта супярэчыць плану ад траўня, у якім было вызначана, што за кожнага закладніка будуць вызваленыя 30 тэрарыстаў, без асуджаных да пажыццёвага тэрміну.

На 50-ы дзень дзеяння пагаднення будзе прызначаная дата поўнага вываду войскаў ЦАХАЛа з Філадэльфійскага калідора.

Зона бяспекі паміж сектарам Газа і навакольнымі ізраільскімі селішчамі будзе мець шырыню блізу 700 метраў, за выключэннем пяці адрэзкаў, дзе шырыня складзе 1,1 кіламетра.

Той самай раніцай прэм'ер-міністр Біньямін Нетаніягу сустрэўся з міністрам фінансаў Бецалелем Смотрычам («Рэлігійны сіянізм») і дасягнуў з ім дамоўленасцяў датычна аднаўлення баявых дзеянняў у сектары Газа пасля рэалізацыі ўгоды і змянення парадку размеркавання гуманітарнай дапамогі. «Без поўнага вяртання да вайны мы выйдзем з ураду», – падкрэсліў Смотрыч на перамовах з Нетаніягу.

Выйсці з ураду (але не з кааліцыі) пагражае таксама кіраўнік партыі «Габрэйская моц» міністр нацыянальнай бяспекі Ітамар Бен-Гвір. Тым не менш напярэдадні ўгоды на пасяджэнні вузкага кабінета Смотрыч і Бэн-Гвір прагаласавалі супраць. На гэты выпадак лідар партыі «Еш Атыд» Яір Лапід заявіў, што ягоная партыя прапануе ўраду Нетаніягу дзеля ўгоды «страховачную сетку».