Пад Лідай прадаюць лікёра-гарэлачны завод «Мажэйкава»

• 18.01.2025, 19:44

Ён патаннеў больш як удвая.

У канцы студзеня на аўкцыёне чацвёрты раз будуць прадаваць лікёра-гарэлачны завод, які належыць дзяржаве, у аграгарадку Мажэйкава. Як вынікае з абвесткі на пляцоўцы «Белпраўзабеспячэнне», кошт лота знізіўся з 30 да 12 млн рублёў, піша officelife.

Лікёра-гарэлачны завод "Мажэйкава" шукае пакупніка з ліпеня 2024 года. Лот уключае ў сябе 14 будынкаў, сярод якіх цэх лікёра-гарэлачных вырабаў, спіртасховішча, склад гатовай прадукцыі, міні-ЦЭЦ і г. д. Разам з нерухомасцю прадаецца і абсталяванне.

Калі завод працаваў, на ім выраблялі гарэлку, лікёры, брэндзі.

Вядома, што ў 2010 годзе на прадпрыемстве праводзілі рэканструкцыю. Завод належыць сельгаспрадпрыемству "Мажэйкава", у 2019 годзе яно прызнанае неплацежаздольным і знаходзіцца ў санацыі.

Першапачаткова летам летась завод хацелі прадаць за 20,3 млн рублёў, але да восені кошт вырас да 30 млн, затым знізіўся на 6 млн. Прадаць завод пакуль не ўдалося.

Чарговыя таргі пройдуць 28 студзеня.