У Беларусі ўвялі пенсійнае новаўвядзенне

• 20.01.2025, 11:02

Яно спадабаецца не ўсім.

Міністэрства антыманапольнага рэгулявання і гандлю (МАРГ) устанавіла кошт паслуг выплаты і дастаўкі пенсій праз пошту. Адпаведны дакумент быў апублікаваны на Нацыянальным прававым інтэрнэт-партале.

Згодна з дакументам, за атрыманне пенсіі ў аддзяленні пошты пенсіянерам давядзецца заплаціць 1,8 рубля. За дастаўку пенсіі паштальёнам на дом - 8,5 рубля. Гэтыя сумы будуць спаганяцца за кожную выплату ці дастаўку ў Менску, а таксама ў абласных і раённых цэнтрах.

Аднак паслуга будзе выконвацца толькі пасля ўнясення платы за яе і толькі для тых пенсіянераў, хто самастойна абраў атрыманне пенсіі праз пошту.

Пры гэтым прадугледжаны выключэнні: пенсіянеры старэйшыя за 70 гадоў, інваліды, а таксама грамадзяне, якія жывуць у сельскай мясцовасці, вызвалены ад аплаты гэтых паслуг. Гэта таксама распаўсюджваецца на іншыя катэгорыі, указаныя ў нарматыўных актах.