Метэарыт упаў у Менскай вобласці

• 20.01.2025, 11:26

Яго маса ацэньваецца на некалькі кілаграмаў.

25 снежня а 17:29:15, калі неба яшчэ заставалася светлым, тры камеры Беларускай метэорнай сеткі зафіксавалі супербалід з яркасцю, блізкай да поўні. Ён праляцеў над Менскам і прызямліўся паблізу Смалявічаў у выглядзе метэарыта, піша kraj.by

Агульная маса метэарытнага рэчыва, якое ўпала, ацэньваецца на некалькі кілаграмаў.

Разлічана траекторыя палёту метэарыта і магчымае поле яго падзення. Фрагменты метэарыта, як мяркуецца, выпалі па лініі вёсак: Рабы Слуп (10—50 грам), Прысынак (50—150 г), Калюга (150—300 г), Чорны лес (300—500 г), Высокія Ляды (500 г — 1 кг) ).

Мясцовым жыхарам прапануецца зважаць на незвычайныя камяні розных памераў, якія могуць ляжаць на паверхні. Метэарыт можа мець наступныя характарыстыкі:

- чорная абгарэлая скарынка з расколінамі або сколамі.

- чорная матавая або карычневая ржавая паверхня.

- ён прыцягваецца магнітам, шчыльны і не друзлы.

Знойдзены метэарыт мае вялікае навуковае значэнне і можа стаць шостым вядомым метэарытам на тэрыторыі Беларусі.

19 студзеня з дапамогай валанцёраў ужо былі арганізаваныя першыя пошукі.