Праз 10 гадоў: у Ізраілі пахавалі Арона Шауля
- 20.01.2025, 17:40
Яго парэшткі вярнулі дадому ў выніку спецыяльнай тайнай аперацыі ў сектары Газа.
Сёння, 20 студзеня, родныя пахавалі Арона Шауля, які загінуў у аперацыі «Непарушная скала» ў 2014 годзе, чыё цела ХАМАС утрымліваў у Газе больш за 10 гадоў.
Учора ЦАХАЛ і ШАБАК вярнулі яго парэшткі дадому ў выніку спецыяльнай таемнай аперацыі ў сектары Газа.
Цырымонія развітання прайшла на могілках пасёлка Парыя-Іліт побач з Цверыяй. Тысячы людзей праводзілі Арона Шаўля ў апошні шлях, піша выданне «Детали» са спасылкай на Walla. Сярод іх былі прэзідэнт Ізраіля Іцхак Герцаг, спявак Ідан Амедз, кіраўнік «Дзяржаўнага лагера» Бені Ганц (у 2014 годзе ён быў начальнікам генштаба ЦАХАЛа), дэпутаты Гадзі Айзенкот, Элазар Штэрн, Орна Барбівай, Ідзіт Сільман і Офір Софер.
Арона Шаўля пахавалі побач з яго бацькам Герцлем, які памёр ад раку ў 2016 годзе.
Маці Зехава змагла развітацца з сынам. «Мой дарагі Арон. Тое, што я скажу, будзе нічым у параўнанні з тым, хто ты ёсць насамрэч. Я чакала цябе дзесяць з паловай гадоў. Штодня. Я не магла паверыць, што аднойчы — бум, Арон будзе дома, Арон вернецца з палону», — сказала яна.
«Я дзякую Арміі абароны Ізраілю, ШАБАК і прэм'ер-міністру за тое, што яны зрабілі добрую справу і вярнулі цябе да мяне. Я кахаю цябе так моцна, што нават не ведаю, што сказаць. Мне ёсць што сказаць, але ў мяне няма сілы. Паглядзі на ўсіх сяброў, якіх ты любіў. Усе прыйшлі развітацца з табой. Разам з намі. І я хачу падзякаваць тым, хто вярнуў цябе. Усім параненым жаўнерам - зычу поўнага акрыяння, а тыя, хто ўсё яшчэ знаходзіцца ў Газе, няхай будуць вызваленыя як мага хутчэй. Я кахаю цябе».
Прэзідэнт Ізраіля Іцхак Герцаг папрасіў прабачэння ў родных жаўнера: «Дарагая сям'я Шауль, ад імя ўсёй дзяржавы Ізраіль я прашу ў вас прабачэння. Даравання за пакутлівыя гады, якія вы ўсе перажылі ў чаканні сына і брата, які павінен быў вярнуцца. Гады, у якія мы не выканалі сваю задачу, свой абавязак: вярнуць яго сюды - на яго радзіму».
Спявак і актор Ідан Амедзі суправаджаў сям'ю Шауля шмат гадоў і падтрымліваў іх барацьбу за вяртанне Арона. Пасля таго, як Амедзі быў цяжка паранены ў сектары Газа, Зехава, маці Арона, адной з першых наведала спевака ў шпіталі.
Старэйшы сяржант Арон Шауль загінуў у Шуджаі 20 ліпеня 2014 года падчас аперацыі «Непарушная скала». Арон і яшчэ шэсць байцоў 13-га батальёна брыгады «Галані» былі забітыя супрацьтанкавай ракетай, якая трапіла ў бронетранспарцёр, у якім яны ехалі.
Прыкладна праз тыдзень пасля ЦАХАЛ абвясціў Шауля мёртвым, але яго цела было выкрадзенае ХАМАСам. З пункту гледжання галахі Шауль быў жаўнерам, чыё месца пахавання невядомае. Адпаведна, у Ізраілі не праводзіўся абрад пахавання, і яго сям'я не сядзела «шыву» па ім.
Ізраіль шмат гадоў спрабаваў вярнуць цела Арона Шауля. 19 студзеня 2025 года яго вярнулі ў выніку таемнай аперацыі, праведзенай спецпадраздзяленнем «Шаетэт 13», ШАБАКам, 162-й дывізіяй ЦАХАЛа і падраздзяленнямі вайсковай выведкі.