Не толькі здароўе: Чаму сарваўся візіт Лукашэнкі ў Кітай
- 21.01.2025, 16:18
Палітолаг назваў дзве прычыны.
У пачатку 2025 года, 3 студзеня, Лукашэнка анансаваў візіт у Кітай. Паездка павінна была адбыцца да так званых выбараў – 26 студзеня. Візіт дыктатара да Сі Цзіньпіна не адбыўся.
СМІ агучылі дзве магчымыя версіі. Першая – пагаршэнне здароўя Лукашэнкі, другая – Кітай сам пастанавіў, што пакуль не хоча сустракацца з Лукашэнкам.
Якая з іх бліжэйшая да праўды? Пра гэта сайт Charter97.org пагутарыў з палітолагам Анатолем Котавым:
– Сумняваюся ў тым, што Кітай пастанавіў, што Лукашэнка ім не патрэбны. Было б складана рабіць такія гучныя, публічныя заявы, калі б не было папярэдніх дамоўленасцяў. Чыннік варта шукаць у крыху іншай плоскасці.
Па-першае, гэта ўсё ж здароўе Лукашэнкі, якое не спрыяе такім сур'ёзным далёкім пералётам, якія нагружаюць арганізм. Тым больш упісаць візіт у «перадвыбарчы» каляндар было б даволі складана і магчыма толькі пры ідэальным здароўі.
Бо Кітай – гэта мінімум 3-4 дні з улікам пералётаў і нейкага мінімальнага часу знаходжання там. Трэба прынамсі 1,5–2 працоўныя дні, інакш гэта не візіт, а непавага да гаспадароў.
Гэтыя чатыры дні, з улікам чынніку здароўя Лукашэнкі, было немагчыма знайсці. Плюс, зноў-такі, у самога візіту павінна было быць некалькі мэтаў. Асноўных я вылучыў бы дзве. Першая – пошук публічнай падтрымкі, але адразу скажу, што наўрад ці б там таварыш Сі адкрыта пажадаў Лукашэнку перамогі на «выбарах». На такі крок нават Крэмль не пайшоў, абмежаваўшыся тэлефонным званком і даволі дзіўным пажаданнем «поспехаў», не больш за тое.
Другая мэта, якой хацеў бы дасягнуць Лукашэнка ў Кітаі, – грошы. Без атрымання чарговага крэдыту пад што-небудзь ці вялікага падарунка, але стасункі з Кітаем у фінансавай сферы крыху азмрочаныя тым, што Лукашэнка не з'яўляецца надзейным партнёрам у плане выплатаў.
Самы амбіцыйны праект – будаўніцтва прыватнага калійнага завода пад гарантыі ўраду Беларусі і кітайскі крэдыт – застопарыўся. Грошы, я так разумею, ніхто кітайцам вяртаць не спяшаецца. Беларусь не моцна хоча расплачвацца за пазыкі сябра Мішы (расейскі алігарх Міхаіл Гуцырыеў – заўв. рэд.).
У такой атмасферы ехаць, каб прасіць чарговыя грошы, было б для Лукашэнкі максімальна некамфортна. Тут здароўе, а таксама немагчымасць вызначыць як мінімум адну з дзвюх задачаў на кітайскім кірунку. Гэта і з'яўляецца той прычынай, чаму анансаванае мерапрыемства так і не адбылося.