УСУ адкінулі расейцаў ля двух населеных пунктаў

• 22.01.2025, 9:28

Украінскія сілы наступаюць каля Шаўчэнкі і ва Удачным.

У ноч на 22 студзеня ўкраінскія вайскоўцы паспяхова адбілі атакі супраціўніка паблізу населеных пунктаў Шаўчэнкі і Удачнага. У той жа час, паводле звестак аналітычнага праекту DeepState, расейскія войскі працягваюць наступ у іншых раёнах Данецкай вобласці.

Паводле інфармацыі DeepState, вораг прасунуўся ля Вялікай Навасёлкі, Уздвіжанкі, Славянкі і Сярэбранага.

Расейскія акупанты спрабуюць захапіць Вялікую Навасёлку, імкнучыся перарэзаць дарогу з Зялёнага Поля і заняць населены пункт без вулічных баёў.

Акрамя таго, расейскае войска абыходзіць Пакроўск з поўдня, набліжаючыся да мяжы з Днепрапятроўскай вобласцю. Цяпер супраціўнік рухаецца ў кірунку Котліна і Удачнага, размешчаных на трасе Межавая-Пакроўск.

Са слоў спікера аператыўна-стратэгічнай групоўкі войскаў «Хорціца» Віктара Трэгубава, акупанты валодаюць колькаснай перавагай і вядуць актыўныя наступальныя дзеянні, спрабуючы захапіць найбліжэйшыя вёскі для частковага акружэння Пакроўска.

Кіраўнік Пакроўскай гарадской ваеннай адміністрацыі Сяргей Дабрак паведаміў аб імклівым узмацненні абстрэлаў горада расейскімі войскамі. Зараз вораг знаходзіцца менш чым за тры кіламетры ад горада.

У Тарэцку працягваюцца разлютаваныя баі. Вораг выкарыстоўвае тактыку «выпаленай зямлі», разбураючы гарадскую інфраструктуру і пазіцыі ўкраінскіх вайскоўцаў.