У Запарожскай вобласці ГУВ знішчыла расейскую РЛС «Гармонь»

• 24.01.2025, 10:43

Акупанты самі напрасіліся на паўторны ўдар.

Украінскія выведнікі знайшлі на акупаванай тэрыторыі Запарожскай вобласці расейскую радыёлакацыйную станцыю 1Л122 «Гармонь».

Пра гэта паведамляе Галоўная ўправа выведкі Мінабароны Украіны.

Як расказалі ў ГУВ, праз варункі надвор'я першая спроба паражэння варожага радара не ўдалася.

Аднак расейцы пачулі выбух і надумалі эвакуяваць абсталяванне.

«Склалі РЛС, загрузілі ў машыну, і ўжо садзіліся ехаць, але прыляцела зноў», – сказана ў паведамленні.

У выніку ўдару была знішчаная і РЛС «Гармонь», а таксама вайскоўцы, якія абслугоўвалі тэхніку і аўтамабіль расейскіх спецыялістаў радыётэхнічнай выведкі РФ.