РФ асцерагаецца нападу на Крымскі мост

• 25.01.2025, 19:34

На мосце ў бок паўвострава ўвялі суцэльны кантроль пашпартоў.

На Крымскім мосце ў кірунку ў акупаваны Крым уведзены пашпартны кантроль, паведаміў намеснік міністра транспарту рэгіёну Аляксандр Аўдзіенка ў тэлеграм-канале.

"Суцэльны пашпартны кантроль уведзены на Крымскім мосце ў кірунку ў Крым - спецыяльныя службы вядуць антытэрарыстычныя мерапрыемствы", - паведаміў ён. Пашпарт можна падаць як у выглядзе арыгінала, так і праз "Дзяржпаслугі".

Падставай для кантролю ён назваў указ дыктатара РФ аб увядзенні павышанага ўзроўню рэагавання ў Крыме і Краснадарскім краі, распараджэнне кіраўніка Краснадарскага краю аб бестэрміновым увядзенні жоўтага ўзроўню тэрарыстычнай пагрозы ў рэгіёне і г.д.

Праязджаць па мосце дазволена легкавым аўтамабілям і рэйсавым аўтобусам. Перад праездам на мост транспартныя сродкі і грамадзян надглядаюць (у ручным ці апаратным фармаце). Праз гэта ў курортны перыяд перад мостам утвараюцца заторы.

Праверкі былі ўведзены пасля спроб УСУ разбурыць мост.