Кіраўнік МЗС Літвы заклікаў ЕЗ падтрымаць пазоў у МКС супраць Лукашэнкі

• 27.01.2025, 15:04

Дыктатар вінаваты ў злачынствах супраць чалавечнасці.

26 студзеня ў Беларусі «чарговым разам прайшло арганізаванае мерапрыемства па перапрызначэнні» Лукашэнкі, якое нельга назваць «ні выбарамі, ні чым-небудзь іншым, што нагадвала б аб дэмакратычных працэдурах і інстытутах», заявіў журналістам кіраўнік МЗС Літвы Кястуціс Будрыс 27 студзеня ў Брусэлі перад пасяджэннем кіраўнікоў замежнапалітычных ведамстваў краін Еўразвязу.

Чыноўнік заклікаў не забываць, што «Беларусь адыграла сваю ролю ў незаконнай агрэсіі Расеі супраць Украіны, і за гэта Беларусь і яе кіраўніцтва таксама павінны несці адказнасць».

«Мы заклікаем нашых еўрапейскіх сяброў, краіны — чальцы ЕЗ падтрымаць перадачу Літвой спраў аб злачынствах супраць чалавечнасці ў Міжнародны крымінальны суд, гэта правільная пастанова», — заявіў ён, відавочна, маючы на ўвазе перададзеныя 30 верасня 2024 года літоўскім урадам матэрыялы аб «трансгранічных злачынствах». супраць чалавечнасці, учыненых Лукашэнкам і яго суўдзельнікамі ў дачыненні да беларусаў».