Трамп назваў кітайскі ШІ «трывожным званком»

• 28.01.2025, 18:43

ЗША засяродзяцца на канкурэнцыі.

Прэзідэнт ЗША Дональд Трамп заявіў, што выпуск ШІ-памочніка DeepSeek кітайскай кампаніяй павінен стаць «трывожным званком» для амерыканскіх тэхналогій. Пра гэта паведамляе The Guardian.

Дадатак DeepSeek, які запусцілі на мінулым тыдні, стаў самым папулярным у Apple App Store. Ён канкуруе з прадуктамі вядучых амерыканскіх кампаній, напрыклад OpenAI, але каштуе значна танней.

«Я чытаў пра Кітай і некаторыя кампаніі ў Кітаі…якія вынайшлі больш хуткі і менш дарагі метад. Калі гэта праўда - а ніхто напраўду не ведае, ці так гэта - я ўважаю гэта станоўчым. Вы не будзеце марнаваць столькі, і вы атрымаеце той жа вынік, спадзяюся», - сказаў Трамп.

Ён дадаў, што дадатак «павінен стаць трывожным званочкам для амерыканскіх галін» і што Штатам трэба «засяродзіцца на канкурэнцыі, каб перамагчы».

«Таму што ў нас найлепшыя навукоўцы ў свеце. У нас заўсёды ёсць ідэі. Мы заўсёды першыя. Мы збіраемся вызваліць нашы тэхналагічныя кампаніі і будзем дамінаваць у будучыні, як ніколі раней», - сказаў прэзідэнт ЗША.