Беларусы сталі найбуйнейшай групай замежных працаўнікоў у Літве

• 29.01.2025, 17:14

Найбольшы прырост назіраецца ў фінансавай і страхавой дзейнасці.

Са звестак Службы занятасці Літвы, колькасць прыехаўшых і працаўладкаваных беларусаў з 2022 года павялічылася да 46,6 тысяч чалавек, піша Delfi.

Гэта найбуйнейшая замежная група работнікаў у краіне. На другім месцы ўкраінцы, колькасць якіх у літоўскай эканоміцы складае крыху больш за 46 тысяч.

Паводле слоў намесніка дырэктара Службы занятасці Гедры Сінкявічэ, з 2022 года колькасць беларускіх работнікаў у Літве павялічылася на 33,6 тысяч чалавек.

Адзначаецца, што найбольш беларускіх грамадзян працуе на прадпрыемствах транспартна-лагістычнай галіны (33,1 тыс.) і ў будаўніцтве (5,6 тыс.).

Найбольшы рост назіраецца ў фінансавай і страхавой дзейнасці: на пачатак 2022-га там працавала сем беларусаў, цяпер - 114. Такая ж тэндэнцыя ў ІТ-галіне - рост з 631 да 3,5 тысяч.

У апрацоўчай прамысловасці працуе амаль у тры разы больш грамадзян Беларусі, чым у 2022-м, - 1,3 тысяч чалавек; у сферы рамонту аўтатранспартных сродкаў і матацыклаў - у чатыры разы (больш за 1 тыс.); у адміністрацыйнай і сэрвіснай дзейнасці - у восем разоў (541); у сферы паслуг размяшчэння і грамадскага харчавання - у сем разоў (473).

Удакладняецца, што ў Літве беларусы ў асноўным займаюць працоўныя месцы сярэдняй кваліфікацыі (40,9 тыс.). Цяпер на такіх пазіцыях занята ў паўтара раза больш людзей, чым на 1 студзеня 2022 года.

«Колькасць беларусаў, занятых на высокакваліфікаваных працоўных месцах, павялічылася больш чым у пяць разоў - цяпер іх 5,2 тысяч, тады як у 2022 годзе не дасягала і тысячы (895)», - адзначыла Сінкявічэ.