БелАЗ масава падае ў суд на расейскія фірмы

• 31.01.2025, 16:48

Сутнасць усіх пазоваў прыкладна аднолькавая.

Беларускі вытворца кар'ерных самазвалаў БелАЗ масава падае пазовы да расейскіх індывідуальных прадпрымальнікаў і кампаній. З верасня 2024 года беларускае прадпрыемства падало ў расейскія суды больш за 20 пазоваў. Інфармацыя аб справах ёсць у расейскай картатэцы арбітражных спраў, піша Office Life.

Сутнасць усіх пазоваў прыкладна аднолькавая. БелАЗ спрабуе спагнаць кампенсацыю за парушэнне выключных правоў на таварны знак. Часцей за ўсё індывідуальныя прадпрымальнікі ці юрасобы прадавалі на маркетплейсах розныя тавары пад брэндам кампаніі, напрыклад калекцыйныя мадэлі самазвалаў БелАЗ, «якія валодаюць прыкметамі кантрафактнасці», бірулькі, магнітныя пазлы на лядоўні і г.д.

Характэрна, што ў чэрвені 2022 года Калегія Федэральнай службы па інтэлектуальнай уласнасці Расеі прызнала слоўныя абазначэнні «БелАЗ» і BELAZ агульнавядомымі таварнымі знакамі.

Сума кампенсацыі - 50 тысяч расейскіх рублёў. Таксама ў пазовах беларускае прадпрыемства просіць спагнаць з ІП і юрыдычных асоб паштовыя выдаткі і выдаткі па аплаце дзяржпадатку за падачу пазову.

Адметна, што частка спраў разглядаецца ў парадку спрошчанай працэдуры. Прасцей гаворачы, пастанова паводле справы прымаецца аднаасобна суддзём без выкліку бакоў у суд.

У выпадку з індывідуальнымі прадпрымальнікамі суд, як правіла, часткова задавальняе патрабаванні БелАЗа і спаганяе з ІП ад 10 да 25 тысяч расейскіх рублёў, а таксама суму дзяржпадатку і паштовыя выдаткі. Зрэшты, часам суд і зусім спыняе разгляд справы, бо бакі ўкладаюць міравое пагадненне.

Што да юрыдычных асоб, то суд часцей за ўсё цалкам задавальняе патрабаванні беларускага прадпрыемства.