У Маскве адбыўся маштабны пажар

• 31.01.2025, 17:16

Для тушэння давялося прыцягваць цягнік.

Раніцай у пятніцу, 31 студзеня, у Маскве адбыўся буйны пажар. Полымя ахапіла тэрыторыю былога машынабудаўнічага завода імя Чарнышова, а таксама размешчаны інтэрнат.

Паводле звестак расейскіх СМІ, узгаранне пачалося ў будынках завода, якія знаходзяцца ў Сходненскім тупіку, пасля чаго агонь распаўсюдзіўся на суседні хостэл. У выніку было эвакуявана 350 чалавек. Агульная плошча пажару склала 2 тысячы квадратных метраў.

Да прыбыцця ратавальнікаў з будынка інтэрната самастойна выйшлі амаль 300 чалавек. На месцы здарэння працуюць 130 пажарных і задзейнічана 37 адзінак спецтэхнікі. Для ліквідацыі агню таксама прыцягнуты пажарны цягнік. Прычыны ўзгарання на гэты момант застаюцца невядомымі.