У Беларусі ўвялі здзеклівую дапамогу ў беспрацоўі

• 4.01.2025, 11:27

Раней яе памер быў прывязаны да базавай велічыні.

Савет міністраў (Саўмін) Беларусі сваёй пастановай № 1064 ад 31 снежня 2024 года вызначыў памер дапамогі ў беспрацоўі з 1 студзеня 2025-га. Дакумент апублікавалі 4 студзеня на Нацыянальным прававым інтэрнэт-партале.

«Рада Міністраў Рэспублікі Беларусь пастанаўляе вызначыць дапамогу ў беспрацоўі памерам 40 беларускіх рублёў», – сказана ў дакуменце ўраду.

Раней памер дапамогі ў беспрацоўі ў краіне залежаў ад памеру базавай велічыні і быў «плыўным». Цяпер яго вызначае Саўмін на ўзгадненне з прэзідэнтам, велічыня фіксаваная.

Так, у 2024 годзе памер дапамогі ў беспрацоўі складаў ад 28 да 80 беларускіх рублёў за месяц. Памер залежаў ад таго, як доўга чалавек не працаваў і ці звяртаўся ён па дапамогу ўпершыню. Да прыкладу, тым, хто станавіўся на ўлік у службу занятасці і спрабаваў працаўладкавацца першы раз, за першыя трынаццаць тыдняў прызначалі дапамогу памерам 85% базавай велічыні (у 2024-м – 34 рублі), а за наступныя трынаццаць тыдняў – 70% БВ (28 рублёў раней).