Літва прадаўжае набываць ёд у таблетках праз суседства з БелАЭС

• 6.01.2025, 21:41

Улады краіны выдаткавалі на лекі €500 тыс.

Літва набыла 5 млн таблетак ёду, паведамляецца на сайце Міністэрства аховы здароўя суседняй краіны.

Іх набылі на выпадак аварыі на Беларускай атамнай электрастанцыі (БелАЭС), якая знаходзіцца каля літоўскай мяжы і за 40 км ад Вільнюса.

«Праз небяспечнае суседства з ядзерным аб'ектам мы павінны забяспечыць жыхароў краіны, каб у выпадку няшчасця яны маглі скарыстацца неабходным медыцынскім прэпаратам», – сказала кіраўніца Міністэрства аховы здароўя Марыя Якубаўскенэ.

Вядома, што за €500 тыс. набыта 5 млн таблетак, якія абараняюць шчытападобную залозу. Гэтая партыя для тых, хто жыве ў радыусе 100 км ад БелАЭС, – амаль трэць насельніцтва краіны.

Упершыню акцыю раздачы ёду правялі ў 2020 годзе.