УСУ выбілі паўночнакарэйскіх вайскоўцаў з сяла Мікалаеўка ў Курскай вобласці

• 9.01.2025, 18:56

Танк вёў агонь прамым навядзеннем па пазіцыях акупантаў з блізкай адлегласці.

Узброеныя сілы Украіны прадаўжаюць дэманстраваць поспехі ў Курскай вобласці, дзе байцы 22-й асобнай механізаванай брыгады выбілі паўночнакарэйскіх наймітаў з населенага пункта Мікалаеўка.

Аперацыя была праведзеная пры падтрымцы ўкраінскіх дронаў, якія дапамагалі каардынаваць дзеянні пяхоты.

Украінскія вайскоўцы выкарыстоўвалі ўдарныя FPV-дроны, каб нанесці кропкавыя ўдары па будынках, дзе хаваліся варожыя войскі.

Таксама танк УСУ вёў агонь прамым навядзеннем па пазіцыях акупантаў з блізкай адлегласці.

Пасля гэтага пяхотнікі 22-й брыгады правялі зачыстку ўсіх дамоў у вёсцы, правяраючы іх на наяўнасць паўночнакарэйскіх вайскоўцаў, якія падтрымліваюць Расею на гэтым адрэзку фронту.

Паводле вынікаў аперацыі было ліквідавана не менш за дзевяць праціўнікаў.

Відэа з кадрамі паспяховай аперацыі было апублікаванае Тэлеграм-каналам SIMARGL, які асвятляе працу ўкраінскіх падраздзяленняў БПЛА.

Аналіз апублікаваных звестак, праведзены OSINT-аналітыкам @moklasen, пацвердзіў, што аперацыя праходзіла ў раёне вёскі Мікалаеўка Суджанскага раёна Курскай вобласці.