Арэнда кватэраў у Менску вырасла на 15%

• 1.02.2025, 12:59

Што будзе з коштамі ў 2025 годзе?

Кошты арэнды кватэраў у Менску ў 2024 годзе выраслі на 10–15%, а ў асобных сегментах – да 20%, паведамляюць эксперты агенцтва «Твая сталіца». Сярод прычынаў росту попыту яны называюць цікавасць з боку замежнікаў: у Беларусь прыязджаюць на працу спецыялісты з Расеі, Украіны, Таджыкістана, Кітая і Ізраіля, паведамляе «Еўрарадыё».

Паводле звестак экспертаў агенцтва, зімовы сезон 2024/25 не прынёс традыцыйнага спаду актыўнасці.

Змяняецца паняцце «элітнага» жылля: замест кватэраў з ляпнінай і вензелямі цяпер арандатара больш цікавяць сучасныя нізкапавярховыя ЖК з закрытай тэрыторыяй, а таксама клубныя дамы.

Арэнда аднапакаёвай кватэры ў Менску

Пентхаусы ў гмахах, як у «Менск-Свеце», сталі страчваць прывабнасць праз заторы і нястачу парковак.

Попыт на кватэры са старым рамонтам падае, іх выцясняюць новабудоўлі. Уласнікі такіх аб'ектаў часта згаджаюцца на рамонт за кошт арандатараў.

Арэнда двухпакаёвай кватэры ў Менску

Сем'яў з дзецьмі сярод арандатараў стала менш – многія аддаюць перавагу браць іпатэку замест арэнды, адзначаюцца эксперты.

Студэнты, насуперак стэрэатыпам, гатовыя плаціць $500–700 за жыллё, асабліва магістранты і замежнікі.

Арэнда трохпакаёвай кватэры ў Менску

Эксперты ў 2025 годзе не чакаюць рэзкага росту коштаў, але і зніжэння не прадбачаць. Узімку кошт можа стабілізавацца, а да лета – вырасці на 5–10%.