У ПДР Беларусі пастанавілі ўнесці змены, якія спадабаюцца відавочна не ўсім
- 1.02.2025, 15:29
Яны і раней выклікалі спрэчкі.
У 2025 годзе чыноўнікі маюць намер прыняць змены ў правілы дарожнага руху (ПДР). Яны датычацца раварыстаў і людзей на сродках персанальнай мабільнасці (СПМ) – электрасамакатах, гіраскутарах, сегвеях. Гэтыя магчымыя новаўвядзенні прапісаныя ў плане падрыхтоўкі праектаў заканадаўчых актаў на 2025-ы. Нагадаем, магчымыя новаўвядзенні актыўна абмяркоўваліся летась, піша «Люстэрка».
Адна з асноўных зменаў, якую хочуць увесці, абавязаць раварыстаў і тых, хто перамяшчаецца на СПМ, спешыцца пры перасячэнні праезнай часткі дарогі, гаворыцца ў абгрунтаванні да плану падрыхтоўкі законапраектаў на 2025 год.
Чыноўнікі прыводзяць статыстыку: за 10 месяцаў 2024 года колькасць ДТЗ з удзелам раварыстаў павялічылася на 10,2%, а з удзелам СПМ – на 61,4%. «Пры гэтым у 2023 годзе таксама зарэгістраваны рост гэтых паказнікаў у параўнанні з 2022 годам – на 16% і 60,7% адпаведна», – адзначаюць у абгрунтаванні.
Адной з прычынаў гэтых зменаў улады бачаць тое, што раварысты і тыя, хто перамяшчаецца на СПМ, ігнаруюць цяперашняе патрабаванне – перасякаць праезную частку дарогі з хуткасцю пешахода, які ідзе крокам.
У гэтай сітуацыі чыноўнікі хочуць увесці змену, паводле якой да СПМ будуць адносіць толькі тыя прылады або прыстасаванні, максімальная канструктыўная хуткасць руху якіх не перавышае 25 км/г.
«На сёння пад выглядам сродкаў персанальнай мабільнасці асобнымі прадаўцамі рэалізуюцца прылады з электрычным рухавіком, якія сваімі тэхнічнымі характарыстыкамі адпавядаюць мапедам і нават матацыклам. Пры гэтым прадаўцы запэўніваюць пра адсутнасць неабходнасці наяўнасці пасведчання кіроўцы і рэгістрацыі такіх прыладаў», – гаворыцца ў абгрунтаванні.
Перадгісторыя пытання
Нагадаем, летась прайшло грамадскае абмеркаванне датычна прапанаваных навінак, тады многія негатыўна ацанілі прапанаваныя папраўкі. Адным з самых спрэчных момантаў была прапанова ўвесці спешанне (пераходзіць ад язды да руху пешшу) пры скрыжаванні праезнай часткі для тых, хто ездзіць на СПМ і роварах. Як заявілі пазней у ДАІ, гэтае новаўвядзенне па-ранейшаму хочуць пакінуць, але з агаворкамі.
Так, прапануецца пакінуць магчымасць не спешыцца:
калі праезд рэгулюецца святлафорамі для раварыстаў;
калі па праезнай частцы дапускаецца рух раварыстаў, а таксама яе скрыжаванне па роварнай дарожцы або па краі праезнай часткі не далей за адзін метр;
пры скрыжаванні праезнай часткі па лініі ходнікаў і збочынаў.
Але ў гэтых выпадках раварысты і СПМ абавязаныя будуць саступаць дарогу іншаму транспарту, які едзе па праезнай частцы.