Анатолий Лебедько: «Белорусский правитель болен властью»
- 14.05.2008, 13:28
Заявление Александра Лукашенко о намерении пойти на четвертый президентский срок прокомментировал председатель Объединенной гражданской партии Анатолий Лебедько.
Нагадаем, что беларускі кіраўнік у інтэрв’ю “Рэйтэр” учора заявіў: “Калі сытуацыя будзе такой, як зараз, і са мной асабіста, і ў краіне, то я, зразумела, буду балятавацца на чарговы тэрмін. Калі сытуацыя са мной і з краінай зьменіцца, то рашэньне можа быць іншым. Пакуль я здаровы чалавек, народ ня так ужо моцна мяне крытыкуе, і Захад пачынае разумець. Гэта магчыма. Разьлічвайце на горшае”.
“Гэта не навіна ня толькі для тых людзей, якія займаюцца палітыкай, але і для сярэднестатыстычнага грамадзяніна Беларусі. Пасьля таго, як Лукашэнка пайшоў на зьмены Канстытуцыі, прычым непрымальнымі мэтадамі, стала абсалютна зразумела, што беларускі правіцель хворы на ўладу. І ён яе ня выпусьціць са сваіх рук, пакуль там будзе біцца нейкі пульс. Пакуль Лукашэнка будзе сядзець на троне, ён будзе прагнуць заставацца ва ўладзе. Але ці пасуе такі азіяцкі падыход да ўлады для Беларусі? Фізычна гэта магчыма, але грамадзтвам гэта не прымаецца”, -- паведаміў Лябедзька ў інтэрв’ю “Радыё Свабода”.
Нагадаем, што Лукашэнка ўчора таксама заявіў: “Калі рэйтынг апазыцыі сёньня на ўзроўні арытмэтычнай памылкі, ці могуць яны зьявіцца ў “парлямэнце”? Наша апазыцыя замест таго, каб працаваць з народам, едзе ў ЗША, Вялікабрытанію і Нямеччыну і просіць там грошай. На каго яны працуюць? Нашай апазыцыі трэба сёньня працаваць з нашымі грамадзянамі, прасіць у іх падтрымкі, не прасіць некалькі фунтаў стэрлінгаў у Вялікабрытаніі. Гэта карумпаваная апазыцыя”.
Гэтыя слова таксама камэнтуе старшыня Аб'яднанай грамадзянскай партыі:
“Каб даведацца, ці падтрымлівае нас народ, трэба зрабіць толькі адзін крок — дапусьціць у выбарчыя камісіі ўсіх узроўняў прадстаўнікоў аб'яднаных дэмакратычных сілаў. Хай яны маюць магчымасьць падліку галасоў падчас выбарчай кампаніі ў верасьні гэтага году. Наконт паездак у Эўропу — то тут у ім, напэўна, гаворыць чыстая зайздрасьць. А што да карупцыі, то мы чуем гэта 14 гадоў. Але навошта далёка хадзіць, давайце выйдзем да “царскага сяла” ля Драздоў і паглядзім, колькі там катэджаў па 500—700 тысяч даляраў коштам у прадстаўнікоў аб'яднаных дэмакратычных сілаў, а колькі — у бліжэйшага атачэньня Лукашэнкі. Ці давайце прааналізуем, хто цяпер засяляецца ў новыя мікрараёны? Там грошы з аграгарадкоў і лядовых палацаў. Якія раскрадаюцца і потым ідуць на дабрабыт вельмі вузкай групы насельніцтва. Лукашэнка пра гэта ведае. Мне невядомы ніводзін прадстаўнік аб'яднаных дэмакратычных сіл, якога прыцягнулі да адказнасьці за карупцыю. Іх прыцягвалі да адказнасьці за тое, што яны выходзілі з пратэстамі на вуліцу, удзельнічалі ў палітычных акцыях”.